السلام عليكم ورحمة الله وبركاته
حاب اشارككم مقالة كتبتها عن الbit depth او bit resolution في اعمالنا الصوتية
اولاً لازم نعرف انها قراءة الى معلومات الملف الصوتي في الكمبيوتر ف عشان كذا بوضح لك شغلة في الكمبيوتر بحاول اختصر وتحملني 😅 الكمبيوتر عبارة عن دوائر كهربائية والكهرباء مافيه الا خيارين اما اشارة او بدون اشارة ويعبر عنها في علم الكمبيوتر ب 1 او 0 التخزين في الكمبيوتر يكون على هذا النحو بحيث ان على حسب عدد وترتيب الصفر والواحد بيفهم الكمبيوتر ايش انت تعني وايش يعطيك
الbit اعتبرها غرف تخزين وكل مازادت كل ما كثرت معك غرف التخزين ف اذا الملف 16 bit ف هذا يعني ان فيه تقريبا 65 الف غرفه ممكن تسجل فيها معلومات في كل غرفة اما 0 او 1 وال24 bit فيه حول ال16 مليون غرفة تقدر تسجل فيها معلومات طيب الحين نجي نحللها عندنا في الصوت بشكل عام لما نجي نسجل صوت من المايكرفون واللي هو هاردوير لازم يكون عندنا محول يحول الصوت من الهاردوير (كرت الصوت) الى السوفت وير ولما تحدد الbit في البرنامج انت تحدد له عدد الغرف القصوى اللي ممكن يدخل فيها بيانات الصوت اللي اخذه من كرت الصوت يعني كل ما حددت له غرف اكثر بيقدر يسجل معلومات وتفاصيل اكثر عن الصوت طيب وش اللي بيفرق سمعياً؟
الnoise to signal ratio هو الفرق بين اقل نقطة صوت في التسجيل لاعلى نقطة صوت في التسجيل وكل ما زاد الbit في الملف زاد هذا الفرق بطبيعة الحال لانك تقدر تسجل معلومات اعلى للصوت وصوت اعلى ف انت هنا ابتعدت عن اقل نقطة للصوت ولاكن اذا انت سجلت ملف الbit حقه منخفض ف انت بطبيعة الحال ماعندك مجال تسجل معلومات كبيرة وهذا يخلي صوتك قريب جدا لصوت اقل نقطة وبتسمع صوت تشويش او ازعاج اقدر امثله لك بأنك تسوي كومبرس للصوت بشكل كبير جدا جدا وتشوف شكل الويفه صار مربع لان مافي ديناميكية والصوت كله قريب لبعض لان مافي مجال في الملف ياخذ معلومات اكثر طيب اذا فهمنا اللي فوق، هل يعني احط الbit اعلى شي اقدر عليه وبكذا بيعطيني كوالتي للصوت اعلى؟ الجواب هو لا في الغالب المنصات كلها اللي نسمع فيها مثل اليوتيوب وغيرها اذا ماخاب ضني يضغطوا الملف الى 16 bit اساساً وازيدك من الشعر بيت، لما تخليه 16 او 24 ماراح تسمع الفرق اساسا فما بالك لو تخليه اكثر من 24؟ هل يعني خلاص اسجل على 16 وانتهى الموضوع؟ الجواب يفضل لا في الغالب يفضل انك تسجل على 24 السبب الاساسي هو ان في ال24 بتاخذ تفاصيل اكثر للصوت وهذا بيساعدك في المكس لان البلقنزات لما تتعامل مع الصوت كل ما اعطيتها تفاصيل اكثر كل ما اعطتك اداء افضل وعلى سبيل المثال بلق ان الاوتتيون عشان يحدد الصوت هذا على اي نوته بالضبط وعشان يكون دقيق اكثر واكثر انت تعطيه معلومات اكثر اما اكثر من24 ماتوقع انك ممكن تحتاجه حالياً غير انه بيزيد عليك حجم الملف وشبه مستحيل تسمع الفرق لان لو انك بترفع الصوت لاخره الى ان يعطيك كامل ال32 bit الاكيد ان اذنك بتنعدم وممكن انك تتوفى (بعد عمر طويل ان شاء الله)
اذا في كلامي خطأ فسامحوني وصححوني.
تحياتي...
بالضبط استاذنا bit depth هي الصح, تعقيمك بارز 👌 ,, اي والله هههه ... المشكلة هالسراب والفايروس انتشر وباء الله يكفينااا جميعاا ...